હિમાલયની પવિત્ર ગિરિમાળાઓમાં સ્થિત ભગવાન શિવના દ્વાદશ જ્યોતિર્લિંગોમાંના એક કેદારનાથ ધામના કપાટ 22 એપ્રિલ, બુધવારે સવારે 8 વાગ્યે શુભ મુહૂર્તમાં ભક્તો માટે ખોલવામાં આવ્યા હતા.
શિયાળાના છ મહિનાના વિરામ પછી વૈદિક મંત્રોચ્ચાર અને વિધિ-વિધાન સાથે મંદિરના દ્વાર ખુલતા સમગ્ર કેદારપુરી ‘જય બાબા કેદાર’ અને ‘હર હર મહાદેવ’ના જયઘોષથી ગુંજી ઉઠી હતી.
આ અવસર પર મુખ્ય મંદિરને અંદાજે 51 ક્વિન્ટલ દેશી-વિદેશી ફૂલોથી ભવ્ય રીતે શણગારવામાં આવ્યું હતું. ગત વર્ષની સરખામણીએ આ વર્ષે કેદારનાથ યાત્રા 10 દિવસ વહેલી શરૂ કરવામાં આવી હતી, જેના કારણે શ્રદ્ધાળુઓમાં ખાસ ઉત્સાહ જોવા મળ્યો હતો.
કપાટ ખુલતા પહેલા પરંપરાગત રીતે બાબા કેદારની પંચમુખી ડોલી ધામમાં પહોંચી હતી.
ઉખીમઠના ઓંકારેશ્વર મંદિરથી નીકળેલી આ ડોલી ગુપ્તકાશી, ફાટા અને ગૌરીકુંડમાં વિરામ લેતી કેદારનાથ પહોંચી હતી, જ્યાં હજારો ભક્તોની હાજરીમાં તેનું ભવ્ય સ્વાગત કરવામાં આવ્યું હતું.
આ વર્ષે વહીવટી તંત્ર દ્વારા મંદિરની મર્યાદા જાળવવા માટે નવા નિયમો અમલમાં મૂકવામાં આવ્યા હતા. મંદિર પરિસરમાં મોબાઈલ ફોન લઈ જવા, ફોટોગ્રાફી, વીડિયો અને સોશિયલ મીડિયા રીલ્સ બનાવવા પર સંપૂર્ણ પ્રતિબંધ મુકાયો હતો.
નિયમોના ઉલ્લંઘન કરનાર સામે દંડાત્મક કાર્યવાહી કરવાની ચેતવણી આપવામાં આવી હતી. ઉલ્લેખનીય છે કે 23 એપ્રિલે બદ્રીનાથ ધામના કપાટ ખોલાયા હતા, જ્યારે ગંગોત્રી અને યમુનોત્રીના દ્વાર 19 એપ્રિલે જ ખુલ્યા હતા. આ સાથે ઉત્તરાખંડની ચારધામ યાત્રા સંપૂર્ણ રીતે શરૂ થઈ ગઈ હતી.