આચાર્ય લોકેશજીની રશિયા, યુક્રેન, ઇઝરાઇલ અને પેલેસ્ટાઇનના પ્રતિનિધિઓ સાથે યુદ્ધવિરામ પર ચર્ચા થશે

વિશ્વ ધર્મ કોંગ્રેસમાં આચાર્ય લોકેશજી સહિત 60 દેશોના 100થી વધુ ધર્મઆચાર્યો અને જનપ્રતિનિધિઓ સામેલ થશે

અહિંસા વિશ્વ ભારતી અને વિશ્વ શાંતિ કેન્દ્રના સ્થાપક આચાર્ય લોકેશજી કઝાખસ્તાનમાં યોજાનારી ‘વિશ્વ ધર્મ કોંગ્રેસ’ને સંબોધિત કરશે. યુક્રેન-રશિયા, ઇઝરાઇલ અને પેલેસ્ટાઇનના યુદ્ધ અને વિશ્વમાં વધી રહેલી ધાર્મિક અસહિષ્ણુતા વચ્ચે વિશ્વના પરંપરાગત ધર્મઆચાર્યો અને જનપ્રતિનિધિઓની આઠમી કોંગ્રેસ રાષ્ટ્રપતિ કાસિમ-જોમાર્ટ ટોકાયેવના અધ્યક્ષતામાં “દરેક ધર્મનો સંવાદ ભવિષ્ય માટે તાલમેલ” વિષય પર 15 થી 18 સપ્ટેમ્બર દરમિયાન કઝાખસ્તાનની રાજધાની અસ્તાનામાં યોજાઈ રહી છે.

વિશ્વ ધર્મ કોંગ્રેસમાં આચાર્ય લોકેશજી જૈન ધર્મ અને ભારતનું પ્રતિનિધિત્વ કરશે. તેમની સાથે મોસ્કોના પેટ્રીઆર્ક કિરિલ, અલ-અઝહરના ગ્રાન્ડ ઇમામ શેખ અહમદ અલ-તૈયબ, ઓઆઈસીના રાજકીય બાબતોના સહાયક મહાસચિવ યુસુફ અલ-ડોબે, વિશ્વ બૌદ્ધ ફેલોશિપના અધ્યક્ષ ફલોપ થાયરી વગેરે હાજર રહેશે.

વિશ્વ શાંતિદૂત આચાર્ય લોકેશજી આ અવસર પર યુક્રેન, રશિયા, ઇઝરાઇલ અને પેલેસ્ટાઇનના પ્રતિનિધિઓ ઉપરાંત ઇસ્લામ, ખ્રિસ્તી ધર્મ, બૌદ્ધ ધર્મ, યહૂદી ધર્મ, હિન્દુ ધર્મ, તાઓ ધર્મ અને પારસી ધર્મના ધર્મઆચાર્યો સાથે યુદ્ધવિરામ અંગે ચર્ચા કરીને વિશ્વશાંતિ માટે બેઠક કરશે. આચાર્ય લોકેશજી ‘ડિજિટલ વાસ્તવિકતા અને કૃત્રિમ બુદ્ધિમત્તાના યુગમાં આધ્યાત્મિક મૂલ્યનું મહત્વ’ જેવા સમકાલીન વિષયને પણ સંબોધિત કરશે. શાંતિદૂત આચાર્ય લોકેશજી વિશ્વના વિવિધ દેશોના જનપ્રતિનિધિઓ અને ધર્મઆચાર્યોને ભારતના વિશ્વ શાંતિ કેન્દ્રમાં શાંતિ અને સદભાવના પર યોજાનારી સંગોષ્ઠિ માટે આમંત્રિત કરશે.